Osteitis - a case study.

Hierdie is ’n gevalstudie van ’n kind met osteitis in beide dje linker humerus en regter femur. Die pasiëntjie het baie pyn en ongemak verduur. Hy was byna vier maande in die hospitaal, het vier operasies ondergaan en was vir ’n lang tydperk in ’n gipsspica verpleeg. Osteitis is inflammasie van beenweefsel wat dikwels by kinders voorkom en begin met ’n besering aan ’n groeiende langbeen. Gewoonlik sal die besering spontaan genees maar indien die kind ’n septiese fokus het kan bakterieë wat deur die bloedstroom vervoer word ’n abses veroorsaak. Dit is noodsaaklik dat kinders onmiddellik behandeling ondergaan vir enige septiese fokus, en dat ’n hou aan die bokant van ’n groeiende langbeen in ’n ernstige lig beskou word.